د هویدا اونیزې خبري سایټ خبریال او مسول، مختار وفایي پرون په مزارشریف
کې د ناپطژندو وسلوالو کسانو له لوري ووهل شو.
وفایي چې په مخ باندې ټپي شوی وو، له دې پېښې وروسته د پولیسو له لوري د بلخ ولایت مرکزي روغتون ته انتقال شوی او تر تداوۍ لاندې دی.
د یادې پېښې په غبرګون، نن په مزارشریف کې یو شمېر خبریالانو او رسنیزو فعالینو د یوې ناستې په ترځ کې د خبریالانو پروړاندې تاوتریخوالی وغانده.
په بلخ کې د افغانستان د ژورنالیستانو ملي اتحادیې مسوول، فردین فردوس وایي: په دې ناسته کې د خبریالانو ترڅنګ د خبریالانو ملاتړو بنسټنو یو شمېر مسوولینو او د مدني ټولنو فعالینو هم ګډون درلود.
د فردوس په وینا، د نن ناستې ګډونوالو د بلخ ولایت له امنیتي بنسټونو څخه د دغه پېښې د جدي څېړلو غوښتنه وکړه.
وفایي چې خپله یې هم په ننۍ ناسته کې ګډون درلود ویلي دي: څلور تنه وسلوال کسان چې پر موټرسکیلو سپاره وو، پیاده شول د چاقو او تفنګچې په قبضه یې سر او مخ ټپي کړي او بیا تښتېدلي دي.
د وفايي په وینا، نوموړی په وروستیو اونیو کې د تلیفون په واسطه تهدید شوی دی او دا خبره یې هم د بلخ ولایت له امنیتي چارواکو سره شریکه کړې ده.
وفایي په دې وروستیو کې د حزب التحریر او حزب اسلامي په ګډون د تندروو ډلو د فعالیتونو په اړه تحقیقي ګزارشونه جوړ کړي او خپاره کړي وو، نوموړی باور لري چې ممکنه ده د تېرې ورځې پېښه د دغه ګزارشونو له خپرولو سره اړیکه ولري.
د بلخ ولایت د پولیسو چارواکو ویلي دي چې د دغه پېښې په اړه یې څېړنې پیل کړي دي؛ مګر تراوسه یې د دغه پېښې د عاملینو د پېژندلو په اړه کوم معلومات نه دي ترلاسه کړي.
