د سولې خبرو اترو پروسې په تړاو د رسنیو او خبریالانو د صنفي او ملاتړو بنسټونو او رسنیو دریځ نن سهار په یوه خبري غونډه کې بیان شو.
په دې ناسته کې، چې د رسنیو یو شمېر مدیرانو او د افغانستان د ژورنالیستانو او رسنیزو بنسټونو فداسیون د بورډ غړو ګډون درلود، د سولې په خبرو اترو کې ښکېلو لورو ته اعلامیه صادره شوه.
په دغه اعلامیه کې د سولې د خبرو اترو په پروسه کې یو شميرنړیوالو بنسټونه، هیوادونو، افغان دولت، طالبانو او له نورو ټولو هغه بنسټونو چې په دغه پروسه کې ښکیل دي، غوښتل شوي د بیان ازادي او د ازادو رسنیو بنسټيز اصول د هېواد نافذه قانون مطابق په نظر کې ونیسي.
د دغه اعلامې په یوه برخه کې راغلي دي چې رسنۍ او د افغانستان د ژورنالیستانو او رسنیزو بنسټونو فدراسیون د رسنیو او خبریالانو د یوه لوی صنفي او ملاتړي چتر په توګه هیڅکله هم نه غواړي چې هغه ارزښتونه قرباني کړي چې په تيرو اتلسو کلونو کې يې ورته کلکه مبارزه وکړله.
د افغانستان د ژورنالیستانو او رسنیزو بنسټونو د فدراسیون مسوولین وایي چې د خبریالانو او رسنیزو کارکوونکو د پراخ ملاتړ جلبولو لپاره به د هېواد په مختلفو ولایتونو کې دې ته ورته ناستې ترسره او هم به د سولې په تړاو دریځ اعلام شي.
