د مدني ټولنو او د خبریالانو یو شمېر ملاتړو بنسټونو د ټاکنو د امنیت په ټینګښت کې د امنیتي ځواکونو کړنې وستایې.
په هغه محفل کې چې نن د حکومت د رسنیو په مرکز کې جوړ شوی وو د کورنیو چارو وزیر، د اردو لوی دستیز او د ملي امنیت رییس ته ستاینلیکونه ورکړل شول. په دغه محفل کې چې د افغانستان د ژورنالیستانو ملي اتحادیې، نی(د افغانستان د خپلواکو رسنیو ملاتړی) او د افغانستان د رڼو ټاکنو بنسټ(تیفا) له لوري جوړ شوی وو د کورنیو چارو او دفاع وزارتونو او همدارنګه د ملي امنیت د عمومي ریاسټ ځینو لوړپوړو چارواکو پکې ګډون کړی وو.
د افغانستان د ژورنالیستانو ملي اتحادیې اجرایوي رییس، محمد فهیم دشتي په نني محفل کې د ټاکنو د امنیت په ټینګښت کې د امنیتي ځواکونو هڅو ته په اشارې سره وویل: د افغانستان هم دوستان او هم یې دښمنان په دې تمه وو چې څنګه پېښه به رامنځته کیږي. ستاسې کړنې زمونږ د دوستانو سر لوړی او د دغه هېواد د ښمنانو شرمیندګي او سرټیټی شوې.
د کورنیو چارو وزیر، محمد عمر داودزي چې په دغه محفل کې یې د امنیتي ځواکونو په استازیتوب خبرې کوې، د رڼو ټاکنو په ترسره کېدو کې یې د رسنیو او خبریالانو همکاري وستایله او په لویو ملي مسایلو کې یې د خبریالانو او رسنیو د لازیاتو همکاریو غوښتنه وکړه.
