په هغه ناسته کې چې نن د کابل او ولایاتو د خبریالانو او رسنیزو مدیرانو په ګډون جوړه شوې وه، پرېکړه وشوه ترڅو د ټاکنو په جریان کې د یوې آرامه او له امنیتي ګواښونو پرته فضا د تامین لپاره د ترهګریزو ډلو د وران کاره فعالیتونو اړوند خبرونه تحریم شي.
یاده ناسته د افغانستان د خپلواکو رسنیو د ملاتړ بنسټ(نی) په ابتکار او په کابل کې د استرالیا انکشافي سازمان او انټرنیوز په ملاتړ جوړه شوې وه.
په دغه ناسته کې چې(د افغانستان د رسنیزو مدیرانو ملي کنفرانس) تر عنوان لاندې جوړه شوې وه، د هېواد له ټولو ولایتونو څخه خبریالان او رسنیز مدیران ورته رابلل شوي وو او له اوږدو بحثونو وروسته یې پرېکړه لیک صادر کړ چې په هغه کې د ولسمشریزو ټاکنو د دویمې دورې د ښه پوښښ لپاره په یوولسو مواردو ټینګار شوی دی.
د ترهګریزو ډولو اړوند خبرونو د بندیدو ترڅنګ قومي، ژبنیو او سمتي مسایلو ته د لمن وهلو مخنیوی د دغه پرېکړه لیک له مهمو مواردو څخه دي.
همداشان په دغه پرېکړه لیک کې راغلي دي چې رسنۍ باید د ولسمشریزو ټاکنو د ویمې دورې د نوماندانو له توهین او تحقیر څخه ځان وساتي.
یاد پرېکړه لیک چې د ناستې ټولو ګډونوالو پرې لاسلیک کړی دی نږدې دی چې ډېر ژر د هېواد د ټولو رسنیو په واک کې ورکړل شي او له هغوی څخه غوښتنه وشي ترڅو د دغه پرېکړه لیک محتوا د ولسمشریزو ټاکنو په دویمه دوره کې مراعات کړي.
همدارنګه د یادې ناستې ګډونوالو له هغه نړیوالو رسنیو چې د افغانستان لپاره نشرات لري غوښتنه کړې چې د ترهګریزو ډلو اړوند خبرونو د تحریم طرحې ته احترام ولري او رعایت یې کړي.
د ولسمشریزو ټاکنو په لومړۍ دوره کې هم د افغانستان رسنیو د ترهګرو د بریدونو خبرونه تحریم کړی وو. د رسنیو له دغه اقدام څخه د افغانستان د دولت او خلکو او همدارنګه د نړیوالې ټولنې له لوري دروند هرکلی وشو او یو عوامل یې د رایه ورکولو په ورځ د خلکو پراخ ګډون په ګوته کیږي.
