د هېواد له مختلفو رسنیو څخه لسګونه ښځینه خبریالانو له یوې زده کړیزې دورې څخه چې د افغانستان د ژورنالیستانو ملي اتحادیې له لوري جوړه شوې وه فراغت ترلاسه کړ.
دا پروګرام د خوندیتوب، جنسي ځورونې د منع پالیسيو او دیجیتالي خوندیتوب د زده کړې په هدف د ښځینه ژورنالیستانو لپار په کابل کې جوړ شوی وو.
د افغانستان د ژورنالیستانو ملي اتحادیې مسوولین وايي: د ټولو خبریالانو(نارینه او ښخينه) لپاره د خوندیتوب له مواردو څخه خبرېدل یو لازمي امر دی. په همدې خاطر د افغانستان د ژورنالیستانو ملي اتحادیې تېر کال د خبریالانو لپاره یو لارښود چمتو او خپور کړ او په ضمن کې د هېواد په زیاترو ولایتونو کې د خبریالانو لپاره د یاد لارښود محتوا په عملي او نظري ډول تدریس شوه.
دا په داسې حال کې ده چې په کابل کې د خبریالانو خوندیتوب کمېټې په راپور کې راغلي دي: د افغانستان په ښارونو کې ۶۹ سلنه ښځینه خبریالانې ځورول کیږي.
د افغانستان د ژورنالیستانو ملي اتحادیه په نظر کې لري ترڅو د هېواد په ټولو ولایتونو کې د افغان خبریالانو خوندیتوب لپاره د زده کړیزو پروګرامونو په چوکاټ کې د خوندیتوب لارښود محتوا په اړه خبریالانو ته زده کړې ورکړي.
