په پنجشېر کې د ملي تلویزیون د نشراتو مدیر، شکرالله مشعل وایي نن د پنجشېر د والي د یوه ساتونکي له لوري وهل شوي دی.
د مشعل په وینا د دغه تاوتریخوالي دلیل د غره ښویېدو او د پنجشېر په بازارک ولسوالۍ کې د یو شمېر سرکونو د بندېدو په اړه په فیسبوک کې خپره شوې د نوموړي لیکنه وه. نوموړی وایي: له دفتر څخه د خپل کور په لور روان وم چې د والي یوه ساتونکي ودرولم په ښکنځلو یې پیل وکړ او وروسته یې د بوکس او لغتو په وسیله راباندې برید وکړ.
په پنجشېر کې د افغانستان د ژورنالیستانو ملي اتحادیې مسوول، فهیم فطرت وایي چې له مشعل سره یې لیدلي دي؛ مګر د نوموړي پر بدن د وهلو ډبولو کومې نښې نه ښکاري.
په هغه اړیکو کې چې د افغانستان د ژورنالیستانو ملي اتحادیې د پنجشېر له والي، عبدالرحمن کبیري سره نیولي دي، ښاغلي کبیر وویل چې د نوموړي د یوه ساتونکي او د ښاغلي مشعل ترمنځ یوه لفظي شخړه شوې ده؛ مګر هېڅ ډول وهل او ډبول نه دي شوي.
ښاغلي کبیر همدارنګه وویل چې مشعل ته یې ویلي دي په هغه صورت کې چې د ده پر یوه ساتونکي ادعا لري، قضیه به عدلي او قضایي سرچینو ته راجع کړي.
