د افغانستان د ښځینه ژورنالیستانو انجمن، له ښځینه ژورنالیستانو د ملاتړ مرکز او په رادیو او تلویزیون کې د ښځو نړیوال انجمن، له ښځینه ځوانو خبریالانو څخه نمانځنه وکړه. په هغه ناسته کې چې نن د یادو دریو بنسټونو له لوري جوړه شوې وه پنځلسو ښځینه رهبرانو ته د رهبریت د عملي او نظري زده کړیزې دورې تصدیق نامې ورکړل شوې. د ژورنالیستانو او رسنیزو بنسټونو فدراسیون د فعالیت په چوکاټ کې د ښځینه خبریالانو د ملاتړو بنسټونو په ابتکار، له اوو میاشتو راپه دې خوا پنځلس ښځینه خبریالانو د رهبرۍ د پراختیا په پروګرام کې حضور درلود. دغه پنځلس کسیزه ډله د یادو دریو بنسټونو په همکارۍ چې درې واړه د فدراسیون غړي دي، په رسنیو کې د جنسیتي تعادل پالیسي چمتو کړې او په رسنیو کې د ښځو د نقش د څرنګه والي په اړه یو تحقیق کړی او د هغې ترڅنګ یې دایم د فدراسیون په ناستو کې ګډون کړی او د فدراسیون په پرېکړو کې یې خپل نظرونه او وړاندیزونه شریک کړي دي. د ښځینه خبریالانو د یادو بنسټونو د مسوولینو په وینا، د ځوانو ښځینه خبریالانو ترمنځ د رهبرۍ د پراختیا پروګرام له دې وروسته د یوې اوږد مهالې پروسې په چوکاټ کې دوام کوي چې د فدراسیون له لوري به یې ملاتړ کیږي. د دغه پروګرام او د هغه پروسې هدف چې له دې وروسته به جریان لري، د ځوانو ښځینه خبریالانو ترمنځ د مدیریت او رهبرۍ ظرفیت تقویه ده ترڅو د رسنیو او د خبریالانو دصنفي او ملاتړو بنسټونو د مدیریت او رهبرۍ په کچه د دوی حضور ته زمینه برابره کړي.
