نن لمازدیګر، په جلال آباد ښار کې د مزل سیمه ییزې رادیو په خبریال، عمران لمر د وسلوالو کسانو له لوري برید شوی او سخت ټپي شوی دی. په ننګرهار ولایت کې د افغانستان د ژورنالیستانو ملي اتحادیې مسوول، شېرشاه همدرد وايي، تراوسه په عمران د برید دلیل نه دی معلوم او امنیتي ځواکونو د قضیې په څېړلو پیل کړی دی. د افغانستان د ژورنالیستانو ملي اتحادیې د ژورنالیستانو او رسنیزو بنسټونو د فدراسیون د نورو غړو ترڅنګ په دې دلیل چې د عمر ټپونه ژور وو، کابل ته د نوموړي د لېږدولو زمینه برابره کړه او هڅه کوي ترڅو د عمر تداوي په یوه مجهز نظامي او یا هم ملکي روغتون کې پیل شي. د مزل رادیو مسوول، شاه محمود شینواری هم تاییدوي چې د عمران روغتیایي حالت د اندېښنې وړ دی او په خپله ښاغلی شینواری له نوموړي سره کابل ته په لاره دی.
