د لغمان ولایت خبریالانو د بیان آزادۍ له ورځې نمانځنه وکړه، چې دا پروګرام د افغانستان د ژورنالیستانو ملي اتحادیې د ولایتي دفتر له لوري جوړ شوی وو.
یاد پروګرام په لغمان کې د افغانستان د ژورنالیستانو ملي اتحادیې د مسوول، ښاغلي عتیق الله قریشي په وینا پیل او نوموړي په دغه ولایت کې د خبریالانو له کړنو یادونه وکړه او ستاینه یې وکړه.
ښاغلي عتیق الله قریشي وویل: کله چې خبریالان له ستونزو سره مخ کیږي باید د خبریالانو ملاتړي بنسټونه په جریان کې کړي، ترڅو د دوی ستونزو ته رسیدګي وشي.
خبریالانو د یاد پروګرام په ترځ کې د افغانستان د ژورنالیستانو ملي اتحادیې له مرکزي دفتر غوښتنه وکړه ترڅو په دغه ولایت کې د خبریالانو د ظرفیت لوړولو لپاره زده کړیز پروګرامونه جوړ کړي.
د یاد پروګرام په پای کې یوشمېر خبریالانو ته د افغانستان د ژورنالیستانو ملي اتحادیې له لوري ستاینلیکونه ورکړل شول.
د بیان آزادۍ ورځ مو مبارک
