د افغانستان د رسنیو او خبریالانو لپاره
د کویډ ۱۹ د خبري پوښښ څرنګه والی
په ۲۰۱۹ میلادي کال، په نړۍ کې د کرونا ویروس د خپراوي له پیله اړوند نړیوالو بنسټونو له دې ناروغۍ څخه د راپور ورکولو د څرنګه والي د تنظیم لپاره لارښودونه چمتو او خپاره کړي دي.
طبیعي ده چې د نړۍ په کوټ کوټ کې اکثریت د خلکو په اتفاق سره د دغه ناروغۍ د خپاروي، تاثیراتو او له خپریدو څخه د مخنیوي په اړه خپل اطلاعات د رسنیو له لاري لاسته راوړي.
د کرونا د خپراوي او اثراتو او په دې ناروغۍ د مبتلا کیدو څخه د ځان ساتنې په اړه د رسنیو او خبریالانو له لوري هر ډول ناسمه، بې بنسټه او ګمراه کوونکې اطلاع رسونه کولی شي د زیاتو کسانو ژوند له خطر سره مخ کړي، د کرونا خپراوي ته سرعت وبښي او د زیاتې مړینې باعث شي.
د کرونا ویروس د نړۍ په سطحه روغتیایي، ټولنیزې او اقتصادي ستونزې لرلې دي او د دغې مسلې د خبري پوښښ لپاره اقدامات کولی شي په روغتیایي، اقتصادي او ټولنیزو برخو کې مثبت او منفي تاثیرات ولري.
رسنۍ کولی شي خپلو مخاطبینو ته په کره او د پوهاوي وړ اطلاع رسونه کې رغنده رول ولري او دا تنها په هغه صورت کې ممکنه ده چې سمې لارې چارې په نظر کې ونیسي او فقط له کره او تایید شوو اطلاعاتو څخه ګټه واخلي.
د افغانستان د ژورنالیستانو ملي اتحادیه په کابل کې د یونسکو دفتر په مرسته، هڅه کوي ترڅو د افغانستان د رسنیو او خبریالانو لپاره د کویډ ۱۹ ناروغۍ په اړه د راپور ورکولو بهتره، کره او حرفه یی لارې چارې شریکې کړي، ترڅو دوی وکولی شي له دې موثرو او نویو لارو څخه په ګټې اخیستنې سره کره راپور ورکړي او له ناسمو اطلاعاتو څخه ډډه وکړي.
همدارنګه رسنۍ کولی شي د کویډ ۱۹ ناروغۍ په اړه ټولنیز ذهنیت ته په شکل ورکولو کې رغنده رول ولوبوي او په همدې ترتیب د یادې ناروغۍ د خپراوي کچه راټيټه کړي.
له همدې کبله د افغانستان د ژورنالیستانو ملي اتحادیې د کویډ ۱۹ اړوند د رسنیزو فعالیتونو دغه آنلاین پاڼه په خپله ویب پاڼه کې فعاله کړې ده. موږ هڅه کوو ترڅو په دغه آدرس کې کره او اغیزمنې سرچینې د افغان خبریالانو په لاسرسي کې ورکړو، ترڅو له دغه سرچینو څخه په ګټې اخیستنې سره خبریالان او رسنۍ وکولی شي د کویډ ۱۹ ویروس سره د مبارزې په لاره کې رغنده رول ولوبوي.
