د حکومت له لوري نن په غزني ولایت کې د یوې رسمي ناستې په ترځ کې د شهید رحمت الله نیکزاد کورنۍ ته د میرمسجدي خان مډال ډالۍ شو.
د میرمسجدي خان مډال چې د کب میاشتې په ۲۷ مه نېټه، د خبریال په ملي ورځ یې د هېواد ولسمشر اشرف غني له لوري ژمنه شوې وه، نن د غزني ولایت د سیمه ییزو چاراوکو له لوري په یاد ولایت کې د افغانستان د ژورنالیستانو ملي اتحادیې پخواني ولایتي مسوول، شهید رحمت الله نیکزاد کورنۍ ته ورکړ شو.
په غزني کې د بیان آزادۍ قرباني شوې کورنۍ او د خبریالانو ملاتړي بنسټونه د ولسمشر د دې اقدام ستاینه کوي او له حکومت غواړي چې د خبریالانو د قاتلینو په پېژندنه او نیولو کې هم جدي پاملرنه وکړي.
