په دې پروګرام کې د بلخ څه باندې ۳۵ تنو خبریالانو ګډون درلود او د باوري خبري سرچینو، په هېواد کې د کرونا د واقیعتونو د پېژندلو، د روغتیایي حقیقتونو پر بنسټ د اطلاعاتو د وړاندې کولو او د شایعاتو له خپرولو څخه د ځان ساتنې په اړه بحث وشو.
یاد پروګرام چې د افغانستان د ژورنالیستانو ملي اتحادیې او په افغانستان کې د یونسکو دفتر له لوري په لار اچول شوی وو، په دریو برخو کې پرمخ یوړل شو.
د پروګرام لومړۍ برخه زده کړیز ورکشاپ، دویمه برخه کې له کرونا سره د مسوولانه رسنیز چلند په خاطر د رسنیو له مسوولینو سره کتنه او دریمه برخه هم رسنیز پروګرام وو چې هغه کې د ټولنیزې او روغتیایي برخې څخه میلمانه دعوت شوي وو.
دغه پروګرام د هېواد په یو شمېر ولایتونو کې په نظر کې نیول شوی دی او د رسنیو له لوري په افغانستان کې د کرونا د حقیقتونو د خپرولو په برخه کې یو ګتور لارښود واوسي.
